THYSIUS Antonius

THYSIUS Antonius

Antverpianus, natus A. C. 1565. Bonav. Vulcanii in patria discipulus, eum ad Graecam Cathedram Lugduni-Batav. vocatum A. C. 1580. aetat. 15. subsecutus est. Genevae dein in Graecis Is. Casaubonô, in Theologicis Bezâ et Fayô praeceptoribus usus, in angliam abiit A. C. 1589. et Cantabrigiae Witakerum, Oxonii Rainoldum, audiit. Lugdunum inde reversus, Minister Ecclesiae Harlemensis aliquandiu fuit, annô seq. Pastor dein Amstelodami, A. C. 1594. Theologiae Professor Hardervici, Gymnasiô tum primum institutô, A. C. 1601. tandem in inclita Leidensi, creatus, A. C. 1619. ibi obiit. Auctor Corporis Doctrinae Ecclesiarum Belgic. et Paraeneseos, de Theol. Studio capessendo. Pater fil. cognominis, ICti et Philologi celebris. Ex eadem urbe Iacobus, Poeta et πολύγλοττος, in aula Mauritii Cattorum Principis, Bibliothecarii, et LL. exoticarum Interpetis munere per 20. annos functus, Historiarum et Poeseos Proefessor successit Herm. Kirchnero, circa A. C. 1615. Paul. Freherus Theatrô Viror. erudit. claror.